ব্রেষ্ট ফিদিং ৱিকঃ লাল্লকসিদা ঐখোয়গী মমাশিং
নুপী অমগী পুন্সীদা খাইদগী নুংঙাইবা পুক্লীং নুংশিবা অমদি অৱাবা অমসুং নুংঙাইবনা পিক থনবা মতম অমা হায়রগদি অঙাং মীরোনবা হৌখিবা, অঙাং উনবা অমসুং মচাবু খোল্লাং ইনবা হৌবা মতমসিনি। নুপীগী রিপ্রদক্টিব ওগানশিংগী মনুং দা রেষ্ট হায়বসিসু অমনি নুপী অমনা মমা ওইবগী শক্নোন্দা হেক লাভিবা ফাওবা নুপীগী হকচাংদা য়াওরিবা খোমদগী খো ম্লাং থোক্লকপগী থৌওং অমত্তা উবা ফংদে। খোমদা য়াওরিবা মমাররি গ্লান্দশিং অমসুং খোল্লাং শুংবদা অচৌবা থৌদাং লৌরিবা হোর্মোনশিং মথৌ তৌদে। অদুবু নুপী ওইবীগী হকচাংদা মীরোনবা হৌখিবা মতমদগী খোমদা য়াওরিবা মমাররি প্লান্দশিং চাওথোক্লকই। হোমোনশিং মথৌ তৌবা হৌরকই। পোক্লক্লিবা অঙাং অদুগী মবুক থন্নবা মহৌশাগী খুৎশেম ওইনা মথন্তা শেম শারকই। মসিমক য়ান্না নুংশিবা থৌওং অমনি। অসিগুম্বা থৌওং অসিবু ঐখোয়না মপুং ফানা খঙবগা লোয়ননা অঙাংদা মপুং ফানা খোল্লাং ইন্নবা হোৎত্নবা হায়বসিনা ঐখোয় পুম্নমক্কী ইথৌদাং ওইরি ।
রিসার্স কয়ামরুমদগী খঙবা ওল্লে মদুদি মমাগী খোল্লাংদা চীঞ্জাক্কী মচল হায়বদি ন্যুট্রিস্নেল কন্টেন্ট শুনা য়াওবগা লোয়ননা বাইও এক্টিব কন্টেন্টসু য়াওরি। মমাগী খোল্লাংদা প্রোটিন, ভিটামিন, এনজাইমস, এন্টিবোদি অমদি অঙাংগী পুক্লিং হকচাং, ৱাখল পুম্নমক্তা চাওখহনবা ঙম্বা অঙাংশিংগীদমক খাইদগী ফবা চীঞ্জাক ওইরি। মসিগী মহুৎ কনা অমত্তনা শিনবা ঙমদ্রি । লোয়ননা অঙাংনা হেক পোল্লকপা মতমদা হকচাংগী চপচাবা অইং-অশাদা অঙাংনা থকপা ফংলি। মপানগী মহিক মতাই কয়ানসু লায়না চংবা ঙমদ্রি। করিগুম্বা চংলবসু ইরায় লায়না ঙাকথোকপা ঙল্লি। মচাদা মপুংফানা খোল্লাং ইনবদা মমাদা ব্রেষ্ট ন্সের, অঙাংখাও মচিনগী ন্সেরনচিংবা কয়াদগী ঙাকথোকপা ঙল্লি হায়নসু অখং-অহৈশিংনা তাকপীরি।
মসিগী মরুওইবা অসি ঐখোয় খুদিংমক্লা মুন্না খঙমিন্নবগা লোয়ননা মপুংফানা মচাদা খোল্লাং পিথকপা হায়বদি হেক পোকপদগীনা অঙাং অদুনা থা তরুক শুবা ফাওবা মমাগী খোল্লাংতমক নিয়ম চুন্না পিথকপা উন্নবগীদমক্তা ঙম্নবর্গী পা দমদা চহী খুদিংগী আগষ্ট ১ দগী ৭ ফাওবা মালেমগী ওইনা মমাগী খোল্লাং পিথকপা চয়োল পালন হায়দুনা থৌরম পাঙথোক্লি। থৌরম অসি ৱার্ল্ড এপ্লাইন্স ফোর ব্রেষ্টফিদিং এক্সননা শিদুনা ইহান হান্না ইং ১৯৯২ দগী পাঙথোকপা হৌরকখি। ৱাৰ্ল্ড হেলঠ ওর্গানাইজেসনগী মখাদা চহী খুদিংগী তোঙান তোঙানবা থিমশিং পীদুনা থৌরম অসি পাঙথোক্লি।চহী অসিগী থিমদি ঐগ্নঞ্চতঐণ জ্বঠঞ্চ জজ্জ্ব ষ্ণ এইঞ্জ জ্বাও ভূণষ্ঠ, ত্বণঠঐ! হায়বসিনি।অঙাংগীদমক্তা অমদি মমাগীদমক্তা পুক্লিং হকচাং ৱাখল অহুমমতা কান্নবা পিতা নত্তনা ইমুংগী শেল-থুমগী ফিভমদা, অমদি মতম মাংগদবদগী ঙাকথোকপনচিংবা হিরম কয়ামরুমদা ব্রেষ্ট ফিদিংনা কান্নবা পিরবসু মপুং ফানা অঙাংদা খোল্লাং ইনবা ঙমদবগী অচৌবা ইসু অমা ঐখোয়না মায়োক্নদুনা লাক্লি। মসিগী মরুওইবা মরমদি মমাগী খোল্লাং ইনবগী মরমদা অমদি কান্নবর্গী মরমদা খঙদবা, ইমুং-মনুংগী থবক অমদি ইন্সটিট্যুসন কয়াদা মমানা থবক শুবা চৎপা, খোল্লাং থোকপগী চাং ৱাপা, ইমুং-মনুংদা মতেং মপুং ফানা ফংদবা, অমদি মমা ওইবিগী পুক্লিং রাখল চরাংনবা কয়াসিনি। মমানা মচাদা খোল্লাং ইনবা হায়বসি মহৌশাগী থৌওং অমা ওইরবসু মসিবু মপুংফানা পাঙথোকপা মতমদদি ইরায় লায়বা অমা ওইদ্রি। পুম্নমক অসিগী মথক্তা ঙসিদি মণিপুরগী মীয়াম লান থেংনরি। মসিনা ঐখোয়গী খোম ইল্লিবা মমা কয়ামরুমদা হকথেংননা অমদি নাকোইননা চৈথেং পিরি ।
গবর্ণমেন্টকী রিপোর্ট অমগী মতুংইন্না চহিসিগী মে অহুমদগী মণিপুরদা চখরকখিবা ভাইওলেন্স অসিদগী মশা-মশাগী ময়ুমদা চংবা য়াদদুনা রিলিফ কেম্পশিংদা চংম লৌদুনা লৈরিবা মীওই লিশিং ৬০ রোম অসিগী মনুংদা মীরোনবী ৪৬৪ জুলাই ২৫ ফাওবদা রেজিষ্টর তৌখি। মীরোনবী ১৩৯ না অঙাং উন্নখ্রে। দিষ্ট্রিক্টশিংগী ওইনা য়েংসি, ইম্ফাল ৱেষ্টতা মীরোনবী ২৯ গী মনুংদা ২ অঙাং উন্নখ্রে। ইম্ফাল ইষ্টতা মীরোনবী ১০৮গী মনুংদা ৪৪ অঙাং উন্নখে। বিষ্ণুপুরদা মীরোনবী ৪২ গী মনুংদা ৪ অঙাং উন্নখে। ককচিংদা মীরোনবী ৩৩ গী মনুংদা ৬ অঙাং উন্নখ্রে। থৌবালদা মীরোনবী ১৬ কী মনুংদা ২ অঙাং উন্নখে ৷
জিরিবামদা মীরোনবী অহুম লৈরি। কাংপোকপিদা মীরোনবী ৩৭ কী মনুংদা ২ অঙাং উন্নখে। চুড়াচান্দপুরদা মীরোনবী ১৭৪ গী মনুংদা ৭৮ অঙাং উন্নখ্রে। তেংনৌপলদা মীরোনবী অনি লৈরি। উলদা মীরোনবী ২০ গী মনুংদা অমা অঙাং উন্নখ্রে। মসি শুপতংগী রিলিফ কেম্পশিংদা লৈবা মশিংনি। মরি-মতা অমদি নুপীগী মপান্নচিংবা তোঙান তোঙানবা মফমশিংদা চংজফম লৌদুনা লৈরিবী মীরোনবিশিং অমদি অঙাং উন্নরবিশিংগী মশিং য়াওদ্রিবনি ।
মণিপুরদা থোক্লিবা ভাইওলেন্স অসিনা মীরোনবীশিং অমদি খোমইল্লিবী মমাশিংদা অকিবা ফংবা চৈথেংশি পীরি। মহৌশানা মীরোল্লিবী খুদিংমক লান লৈতবা মতম, মীওৎ-মীনৈ অমত্তা লৈতবা মতম ফাওবা হকচাংগী ৱাখলগী ওইবা অৱাবা কয়া লোয়নরিবনি। মিত্তা উদ্রি বা মচাবু কদায়দা শোইখিগদগে হায়বগী ৱাখলদা অহিং- নুংথিল অনিমক্তা পোলুম ওইরিবনি তুম্বা-চাবা, চপা, ফম্বা খুদিংমক্তা পোৎলুম ওইরিবনি। মশা ৱাই শংদ্রিবনি। অঙাং উনখিবগী হকচাং শোবা ফগৎত্রিঙৈ ঈ মতুমগুল্লবা মচাবু মথাদা পমদুনা খোল্লাং ইন্নবা হোৎত্নবা হায়সিসু মহৌশানা অচৌবা অৱাবা ওইরিব নি। অদুবু মদো মমা ওইবিশিংনা অৱাবনি হায়না লৌদে। মচাবু খোল্লাং ইল্লিবনি অসিগুম্বা মহৌশাগী শিংনবশিং অসিগী মথক্তা লানগী চৈথেং নংলবী মীরোলবীশিং অমদি খোম ইল্লিবিশিংগী পুক্লিং-রাখল হকচাংদা ফাওরমগদবা অকিবা, অৱাবা কয়া অদু খল্লুবদা অকিবা পোকই।
লান অসিগী মনুংদা অঙাং উন্নবা থা অমখক্তা ঙাইরিবী মমা অদুনা মে অহুমগী নুমিদাংদা চীং লম্বীদা চীংলোন লান্না থৱায় হিংনবগীদমক্তা লাঞ্জেন্নখিবগী থৌদোক, থা শুরবি নুপী অদুনা চীং লম্বীদা পুং অনি চুপ্পা চেল্লবা মতুংদা আর্মি কেম্পতা হপ্তা অমা চাদ-থক্তনা লৈরকখিবগী থৌদোক, থাবুম নিপান শুরবা মচাবু নাওপুরিবি মমা অদুনা মনঙ্গলদা অপিকপা মচা অমসু পোরগা লৌবুক্তা লৌরিদা চেল্লকখিবগী থৌদোক, অকিবা ফংলবা থৌদোকশিংনি। রিলিফ কেম্পতা লৈরবা মতুংদা নিংথিনা চাবা, পোখাবা ফংখিদবগী থৌদোকশিং কয়া কয়ানি। মীরোনবীশিং অসিগী মরক্তা অঙাং ফাইবোক মীরোনবা, বিপি বাংবা, ঈ ৱাৎপগী অনাবা লৈবা, দাইবেটিক লৈবা কয়া য়াওরি। লোয়ননা অঙাং ফাইবোক পোকপা য়াওরি । মীরোনবিশিং অমদি খোমইল্লিবিশিং নিংথিনা মচন শুবা চীঞ্জাক চাগদবনি। নিংথিনা পোত্থাগদবনি। মতম-মতমগী পুক্লিং রাখলদা ফাওরকপা নুংঙাইতবা কয়া মতম চানা অখং-অহৈশিং তানদুনা কোকহন্নবা হোৎত্নগদবনি হায়বনচিংবা কয়াশিং লৈরবসু লাননা অচৌবা মরম ওইদুনা ৱানা হিংলিবী মীরোনবী অমসুং খোমইল্লিবি মমাশিংদা শুপতংগী ৱাৰ্ল্ড বেষ্টফিদিং ৱিককি মহৌশাগী ওইবা এৱারনেস পিবগী মথক্তা লাঞ্জেল্লিবী অসিগুম্বা নুপীশিংগী পুক্লিং ৱাখলদা লৈরিবা, অকিবা অৱাবা কয়া অসিসু কোকহন্নবা মরি লৈনবা দিপার্টমেন্টশিংনা হোত্নবিবা চংই। রিলিফ কেম্পতা লৈদুনা অপিকপা মচাবু খোল্লাং ইন্দুনা অমদি নমদুনা মচাগী মায়থোং য়েংলগা করম্বা মতমদা য়ুমদা চৎকনি, করি নুমিত্তা লান লোইগনি হায়না হংলিবা ৱাহংসিগী পাউখুম গবর্ণমেন্টনা খুমফম থোকই ।