মনিপুর ইসুগী নো কনফিদেন্স মোসন লোক সভাদা খন্নখে মশিং য়াম্বগী নত্তে অচুম্বা ৱায়েল ফংনবগীনি –কংগ্রেস
ইরৈবাক ন্যুজ সার্ভিস, ইম্ফাল : হৌখিবা মে ৩ দগী মনিপুরদা থোক্লিবা ইসু অসিগী মতাংদা ওপোজিসন পার্টি ইন্দিয়ান নেস্নেল দেবলপমেন্টল এপ্লাইয়েন্স (ইন্দিয়া) না বি জে পি না লুচিংবা এন দি এ লৈঙাক্কী মথক্তা পুখংখিবা নো কনফিদেন্স মোসন ঙসি লোক সভাদা কংগ্রেসকী এম পি গৌরব গোগোইনা পুখতুনা খন্নবা হৌখে। ওপোজিসন্না পুখৎ লিবা নো কনফিদেন্স মোসন অসি মশিং য়াম্বগী চাংয়েং নত্তে। থোক্লিবা ইরাং অসিদা মনিপুরগী মীয়ায়া অচুম্বা ৱায়েল ফং হন্নবা তাল্লিবা দিমান্দগী মতুং ইন্না পুখৎপনি হায়খি। ঙসি লোক সভাদা স্পিকর ওম ব্রিলানা চিয়ার লৌদুনা মীফম ফম্বা হৌরকপদা চরাংনবা থোকপদগী নুমিৎ য়ুংবা ফাওবা য়ৈথোকখি। নুমিৎ য়ুংবা মতুংদা মীফম হৌগৎলকপদা কংগ্রেসকী গৌরব গোগোইনা নো কনফিদেন্স মোসন অদু মুব তৌরকখি। মহাক্না হায়খিবদা ৱান ইন্দিয়া হায়রিবা বি জে পি না মনিপুর অসি চীং তম অনি থোক্না খায়দোক্লে । বি জে পি গী দব্বল ইঞ্জিন লৈঙাক অসি ফেল ওইরে। মনিপুরদা থোক্লিবা ইরাং অসি নুমিৎ ৯০ নি হেল্লুক্লবা ফাওবা প্রাইম মিনিষ্টর নরেন্দ্র মোদিনা ৱাফম অমত্তা ফোংদোক্তনা লৈশিল্লিবা অসিদা অচুম্বা ৱায়েল অদু পুররুবা মোসন অসি থাঙ্গৎপনি হায়খি। মহাক্না মখা তারদুনা মনিপুরদা মৈ চাকপা তারবদি ইন্দিয়া পু ম্বা মৈ চাকপা তাবনি। মনিপুর কায়বা তারবদি ইন্দিয়া কায়বা তাবনি। মরম অদুনা প্রাইম মিনিষ্টর নরেন্দ্র মোদিনা মনিপুরগী ইসু অসিগী মতাংদা তুমিন্না লৈশিনফম থোক্তে। হাউসতা লাড্ডু না চপ চাবা ৱারোল থমফম থোকই। প্রাইম মিনিষ্টর নরেন্দ্র মোদিনা ঙসি ফাওবা মনিপুরগী ইসুগী মতাংদা লোক সভা অমসুং রাজ্য সভাদা ৱাফম অমত্তা ফোংদোক্তি । কাংলুপকী ইরাং মায়োক্লরিবা মনিপুরদা প্রাইম মিনিষ্টর নরেন্দ্র মোদিনা হৌজিক ফাওবা মনিপুরদা চৎত্রিবা অসি করিগীনো হায়না হংখি। মনিপুরদা দ্রগকী ইসু মায়োরুরি। দ্রগকী কর্টেল অসিদা ইতোচা কৌবা মীওই অমা চেন্নরি। মীওই অসি মনিপুর লৈঙাক্কী মিনিষ্টর অমগী ইমুং মনুংগী মীওইশিংনি হায়না মহাক্না হাউসতা ফোংদোকখি। সমাজৱাদি পার্টিগী লুচিং বা দিম্পল যাদবনা হায়খিবদা মনিপুরদা থোক্লিবা কাংলুপকী ইরাং অমদি নুপী অনিদা চখখিবা থৌওং অদু লৈঙাক্না থোকহনখিবনি। হৌজিক ফাওবা প্রাইম মিনিষ্টরনা ৱাফম অমত্তা ফোংদোক্তনা লৈরি। চিফ মিনিষ্টর এন বিরেন্না ষ্টেট অদুদা থোক্লিবা হিংসাগী থবক লাকশিনবা ঙমদ্রি । চিফ মিনিষ্টর এন বিরেন চিফ মিনিষ্টর ফমদগী লৌথোক্সি বা করিগীনো? ষ্টেট অদুদা লৈঙাক পায়রিবা বি জে পি না ষ্টেট অদুগী এদমিনিষ্ট্রেটিব, ফাইনান্সিয়েল অমদি ফেদরেলিজম অ সি থুগায়রে হায়খি। কংগ্রেসকী এম পি রঞ্জন গোগোইনা মনিপুরদা থোক্লিবা ইরাং অসিদা প্রাইম মিনিষ্টরনা মনিপুরদা চৎ ত্রিবা অসি করি মরমগীনো হায়না হংখি। ইরাং অসিগী মতাংদা প্রাইম মিনিষ্টরনা তুমিন্না লৈশিল্লিবা অসিগী মরম পিগদব নি। থোক্লিবা ইরাং অসি লাকশিন্নবা হোৎত্নবদা মনিপুর লৈঙাক্কী হোম দিপার্টমেন্ট অমসুং নেস্নেল সেক্যুরিতি এদভাইজর অসি ফেল ওইরে হায়খি। নেম্নেলিষ্ট কংগ্রেস পার্টিগী লুচিংবা সুপ্রিয়া সুলেনা খন্নবা অদুদা শরুক য়ারদুনা বি জে পি না লুংচিংবা লৈঙাক অসিনা মনিপুরদা নুপী অমসুং অঙাংদা মীওৎ মীনে চখরি। মসি মোদিনা লুচিংবা পার্টি অসিগী ইকায়নিংঙাইনি। মনিপুরগী চিফ মিনিষ্টর খুদত্তা রিজাইন তৌগদবনি। থোক্লিবা ইরাং অসিনা মরম ওইদুনা নুপী লিশিং ১০ হেনবদা পামদবা থৌদোক থোকহনখে হায়বা ৱাফমশিং পুখখি। হৌজিক ফাওবদা ইরাং অসিনা মরম ওইদুনা মীওই ১৭০ গী মথক্তা শিল্পে, কয়া অমনা অশোক অপন নংখ্রে, মীওই কয়ানা লাঞ্জেন্নদুনা লৈরি হায়খি। নো কনফিদেন্স মোসন অদুদা য়ুনিয়ন মিনিষ্টর কিরেন রিজিজুনা হায়খিবদা হৌজিক মনিপুরদা থোক্লিবা ইরাং অসি কংগ্রেসনা লৈঙাক পায়রিঙৈদা মতম শাংনা থওইদনা লাকখিবদগী থোকহল্লকপনি। হৌজিক ওইরিবা ফিভম অসিগী দাইত্ব কংগ্রেসনা পুগদব নি হায়খি। অমরোমদা রাজ্য সভাদা মনিপুরগী ইসু অসিগী মতাংদা ওপোজিসনগী মায়কৈদগী এদজোনমেন্ট মোসন ওইনা খন্ননবা পুখৎলকখি। মদুদা রাজ্য সভাগী চিয়ারমেননা অয়াবা পিদবদগী চরাংনবা থোকখি। হৌজিক লোক সভাগী অপুনবা সিট ৫৩৪ অসিগী মনুংদা বি জে পি না লুচিংবা এন দি এ গী অপুনবা এম পি না ৩৬৬, ওপোজিসন্না ১৪৭ অদুগা অতোপ্পা পাৰ্টিনা ২১ নি। নো কনফিদেন্স মোসন অসিগী পাউখুম থা অসিগী ১০ দা প্রাইম মিনিষ্টরনা পিরবা য়াই ।