মনিপুরদা থোক্লিবা হিংসাগী দাইত্ব কুকি এম এল এ ১০ না পুগদবনি

      মনিপুরদা হৌখিবা মে ৩ দগী থোক্লিবা হিংসাগী থৌদোকশিং অসিগী দাইত্ব পুম্নমক কুকি এম এল এ ১০ না পুগদবনি। ইন্দিয়া লৈঙাক্না ষ্টেট অসিদা পিছ পুরক্লবনি হায়দুনা সস্পেন্সন ওফ ওপরেসন চত্নরিবা কুকি লালহৌবশিংনা মৈতৈ মীচমগী য়ুম মৈ থাবা, মীনুংশি য়াওদনা হাৎপা, ওৎ নৈবা চখরিবা অসি পিছ পুরক্লিব্রা? মসিগী ৱাহন্থোক করিনো? ইন্দিয়া লৈঙাক্লা মনিপুরগী পুৱারি খংলমদবা অসি লাইবক থিবনি হায়না সেকমাইজিন গ্রাম পঞ্চায়ট লেভেল মলটিপরপজ কোওরেটিভ সোসাইটি লিমিটেদকী প্রসিদেন্টকী চেরোলদা হায়রি। ষ্টেট অসিদা লৈরিবা মীয়াম মরু ওইনা নুপীশিংনা মালেমগী নুপীশিংবু অৱাংবা থাক্তা ইকাইখুম্নবা ফুরুপি। হৌখিবা মে ৪ দা থোকখিবা থৌদোক অদু অৱাংবা থাক্তা কন্দেম তৌবগা লোইননা থৌদোক অদুদা চেন্নবশিংগী ময়ুম মৈ থাদোত্তুনা চংশিন খিবা খোঙজং পুম্নমক খংবিফম থোকই। থোক্লিবা থৌদোকশিং অসি সুদা লৈবা কুকিশিংনা মে ৩ গী থৌদোক অদু থোকহল্লম দ্রবদি মে ৪ গী থৌদোক অদু থোক্লল্লোই। থোক্লিবা থৌদোকসি অৱাংবা থাক্কী লো কোর্টশিংনা এস আই টি অমদি মখল কয়াগী টিয়া হকথেংননা থিজিন্নবা হোৎনরকপা খুদিংমক তরাম্না ওকই হায়রি। ইন্দিয়া লৈঙাক্না শেলয়াম চাদিং তৌরগা অমদি মেছিন্নরি ময়াম শিজিন্নরগা পিছ পুরক্লবা লৌখলিবা অসি সুগী মথোং হুক্তবা থৌশিন্না মনিপুরদা থা ৩ হেন্না মৈ চাক্লিবা অসি ইন্দিয়া লৈঙাক্কী অঙম অর্থৌশিংনা কুম্মৈগুয়া য়েংদুনা লৈরিবসি মনিপুরসি ইন্দিয়াগী মনুংদা লৈব্রা? মনিপুরদা মৈহৌরোন্দগী খুন্দা লৈতাদুনা চীংমী তম্মী অমত্তা ওইনা লৈমিন্নরক্লবা মৈতৈ, মৈতৈ পাঙলশিংনা চীং মীশিংবু কদাইফাওবা নুংশিবগে হায়বদু ইন্দিয়া লৈঙাক্না খংবিয়ু হায়রি। ইন্দিয়া নিংতম্বা চহি ৭৪ অসিদা নিংতস্বগী ৱাহন্থোক ফংদ্রবা এসেমব্লি সেগমেন্ট ৮ হৈরোক, ৱাংজিং তেন্থা, খাঙবোক, ৱাবগাই, ককচিং, হিয়াংলম, সুগুনু অমদি জিরিবামগী মৈতৈ অমদি মৈতৈ পাঙলগী মীওই লাখ কয়ানা ঙসি ফাওবদা ভোৎ পিবগী হক ফংহল্লগা ভোৎ লেপ্পগী হক ফংহন্দনা লিশাং শিত্না চীংমীদা ভোৎ পিরগা পার্লিয়ামেন্টকী মেম্বর ওইহল্লি। মনিপুরগী অপুনবগী শক্তম কায়দনা অমদি মহৌশাগী পুন্সিদা লাক্নবা হোৎত্নবদা থৱাইনা পোন্থা পিবা অথৌবা মপারি মমোমশিংগী মফমদা অৱাংবা থাক্তা ইকাইখুম্ন রি। কুকি খুলাই পায়বশিংনা চখরক্লিবা হিংসাগী থৌদোক অসিনা ষ্টেট অসিদা খুন্দারিবা ফুরুপ খুদিংমক্তা অৱাবা চৈথেং পিরিবা অসি পুন্না খোংফম অমদা লেগুনা থেংনমিন্নবা চংই। মনিপুরদা সেপরেট এদমিনিষ্ট্রেসন তাল্লিবশিংনা ৱাখল তামিন্নদুনা মহৌশাগী শক্তমদা হঞ্জিন্নবা পুন্না থৌদাং লৌমিন্নরসি। মৈতৈ ফুরুপ অসি মনিপুরগী লৈমাইদগী মুখলবসু তাল্লিবা দিমান্দশিং ফংবা ভল্লোই। লমদমসিদা মৈহৌরোলদগী খুন্দা লৈতানা লৈমিন্নরক্লবা ফুরুপ খুদিংমক্না ইশা ইশাগী য়ুম ইঙ্গোলদি ইশানা ঙাক শেনগদবনি। মনিপুরগী অপুনবর্গী শক্তম মতম পুম্নমক্তা ঙাক শেনবা হায়বসি ঐখোয় খুদিং মক্কী ইথৌদাংনি। মনিপুরদা পিছ পুররুবা হোৎত্নবিয়ু হায়রি।